Xornada escornabótida
Que é unha Xornada Escornabótida?
Para desenvolver unha Xornada Escornabótida oficial, certificada e titulada, só tes que facer dúas cousas:
- Xunta un grupo de persoas e poñédevos a montar escornabots.
- Deixa os escornabots montados a disposición dun público infantil que os poida usar e iniciarse así no marabilloso mundo da robótica, a programación e a cultura maker.
O grupo de persoas pode ser calquera, unha panda de amigos e amigas, unha asociación veciñal, un makerspace, o claustro dun colexio… o lugar onde vaian quedar os escornabots ten que ser accesible para un público o máis xeral posible (un ou varios colexios, unha biblioteca, un museo, un local social…).
Se podes cumplir as dúas condicións anteriores, podes organizar unha Xornada Escornabótida certificada!
Como organizo a Xornada?
Como queiras… e como poidas! :)
Normalmente, empezariamos por definir cantas persoas vos ides xuntar e cantos robots ides montar. En función disto, o seguinte sería comezar a conseguir as pezas. Se ides pedir ao Lonxano Oriente, teredes que agardar unhas semaniñas a que vaian chegando os ansiados paquetes "Hong Kong Post", así que podedes aproveitar para ir botándolle un ollo ás guías de montaxe e imprimindo as proteínas (pezas impresas en 3D).
É moi posible que non teñas acceso doado a unha impresora 3D, nese caso, podes tentar contactar con algún clube local ou localizar unha impresora cercana.
En canto teñas todo o material, só vos falta xuntarvos e montar os robots… Fácil, non si?
Que coñecementos hai que ter?
Montar as botoneiras require ter unha experiencia mínima na soldadura electrónica, aínda que é un bon proxecto para iniciarse no excitante mundo dos fundidores de estaño. Cargar o software no Arduino é sinxelo, pero terás que ter instalado o Arduino IDE. Modificar os parámetros necesarios para que o voso escornabot funcione é moi doado se tedes un chisquiño de experiencia en programación. Se non a tes, hai unhas instruccións.
Como xa estarás pensando, conseguir líar a alguén cunha pouca rodaxe nestes campos será moi útil para desenvolver a Xornada Escornabótida.
Que conseguimos coas Xornadas Escornabótidas?
Aprender, pasar un rato xuntos, a satisfacción de ter construído algo por ti mesmo, o orgullo de ter aportado á comunidade, a alegría que se levarán os nenos e nenas que xoguen cos escornabots, o ben que o pasarán e… tamén vos daremos un certificado asinado polo mesmísimo Escornabot Cervus! (si, o equipo escornabot non é inmune ao malévolo e poderoso influxo dos certificados oficiais). Saca moitas fotos e moi bonitas, mándanolas ao noso correo ou compárteas con nós en Twitter ou Google+, e te enviaremos o certificado para que poidas chulearte moito con el :)